ਟਿਕਰੀ ਬਾਰਡਰ, 28 ਅਕਤੂਬਰ, 2021:
ਦਿੱਲੀ ਵਿੱਚ ਕੇਂਦਰ ਦੇ 3 ਖ਼ੇਤੀ ਕਾਨੂੰਨਾਂ ਦਾ ਵਿਰੋਧ ਕਰ ਰਹੇ ਕਿਸਾਨਾਂ ਦੇ ਇਕ ਟਿਕਾਣੇ ਟਿਕਰੀ ਬਾਰਡਰ ਵਿਖ਼ੇ ਵੀਰਵਾਰ ਸਵੇਰੇ ਇਕ ਤੇਜ਼ ਰਫ਼ਤਾਰ ਟਰੱਕ ਨੇ ਡਿਵਾਈਡਰ ’ਤੇ ਬੈਠੀਆਂ ਕੁਝ ਅੰਦੋਲਨਕਾਰੀ ਕਿਸਾਨ ਔਰਤਾਂ ਨੂੰ ਦਰੜ ਦਿੱਤਾ ਜਿਸ ਕਾਰਨ 3 ਔਰਤਾਂ ਦੀ ਮੌਤ ਹੋ ਗਈ ਅਤੇ 2 ਗੰਭੀਰ ਜ਼ਖ਼ਮੀ ਹੋ ਗਈਆਂ। ਬਹਾਦਰਗੜ੍ਹ ਫ਼ਲਾਈਉਵਰ ਨੇੜੇ ਵਾਪਰੀ ਇਸ ਮੰਦਭਾਗੀ ਘਟਨਾ ਤੋਂ ਬਾਅਦ ਟਰੱਕ ਡਰਾਈਵਰ ਮੌਕੇ ’ਤੋਂ ਫ਼ਰਾਰ ਹੋਣ ਵਿੱਚ ਸਫ਼ਲ ਹੋ ਗਿਆ।
ਕਿਸਾਨ ਆਗੂਆਂ ਨੇ ਇਸ ਘਟਨਾ ਨੂੰ ਹਾਦਸੇ ਦੇ ਮਗਰ ਲਖ਼ੀਮਪੁਰ ਖ਼ੀਰੀ ਜਿਹੀ ਕਿਸੇ ਸਾਜ਼ਿਸ਼ ਦਾ ਖ਼ਦਸ਼ਾ ਪ੍ਰਗਟਾਉਂਦਿਆਂ ਸਭ ਤੋਂ ਪਹਿਲਾਂ ਫ਼ਰਾਰ ਹੋਏ ਟਰੱਕ ਡਰਾਈਵਰ ਦੀ ਗ੍ਰਿਫ਼ਤਾਰੀ ਦੀ ਮੰਗ ਕੀਤੀ ਹੈ ਅਤੇ ਗ੍ਰਿਫ਼ਤਾਰੀ ਤਕ ਪੋਸਟਮਾਰਟਮ ਲਈ ਸੰਘਰਸ਼ਸ਼ੀਲ ਕਿਸਾਨ ਔਰਤਾਂ ਦੀਆਂ ਮ੍ਰਿਤਕ ਦੇਹਾਂ ਪੁਲਿਸ ਨੂੰ ਸੌਂਪਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਘਟਨਾ ਅੱਜ ਸਵੇਰੇ ਲਗਪਗ 6.15 ਵਜੇ ਬਹਾਦਰਗੜ੍ਹ ਫ਼ਲਾਈਉਵਰ ਨੇੜੇ ਵਾਪਰੀ ਜਿੱਥੇ 7 ਲੋਕ ਡਿਵਾਈਡਰ ’ਤੇ ਬੈਠੇ ਰੇਲਵੇ ਸਟੇਸ਼ਨ ਵੱਲ ਰਵਾਨਾ ਹੋਣ ਲਈ ਆਟੋ ਦਾ ਇੰਤਜ਼ਾਰ ਕਰ ਰਹੇ ਸਨ। ਅਚਨਚੇਤ ਹੀ ਇਕ ਟਰੱਕ ਡਿਵਾਈਡਰ ’ਤੇ ਆ ਚੜਿ੍ਹਆ ਜਿਸ ਨਾਲ ਕੋਹਰਾਮ ਮਚ ਗਿਆ।
